Joh 20 | MED | STEP | Mᵾkᵾlmᵾ unt, Kor Ou kᵾn, kona rumbᵾⱡ ropa pelinga, Makndelin amp Mariya ni, on kona nila purum. Mba kᵾndrᵾm mel, on kona ⱡᵾrᵾk ndurᵾng ku ni, tᵾk mundrᵾng.

John 20

Jisas Ni, Ⱡoporpa Omba Purum.

(On kona ni wei titim)

1 Mᵾkᵾlmᵾ unt, Kor Ou kᵾn, kona rumbᵾⱡ ropa pelinga, Makndelin amp Mariya ni, on kona nila purum. Mba kᵾndrᵾm mel, on kona ⱡᵾrᵾk ndurᵾng ku ni, tᵾk mundrᵾng. 2 Kandpa kᵾn, tᵾkrᵾpa yant omba, Saimon Pita kᵾn, kitip kᵾni wu ti, Jisas ndi, numan ngurum wu ni raⱡ, kundpa nimba mel, “Wu Nuim ni, tᵾk mek pung on kona ei, wei tetᵾm. Mek puk kona nant ila teng nda? Tᵾn pili napᵾnmᵾn,” nitim. 3 Wote Pita kᵾn, kitip kᵾni wu ti kᵾn, on kona ei kunᵾnggil purᵾnggil. 4 Wu ni raⱡ, tᵾkᵾrkᵾⱡ purᵾnggil ila, wu ti ndi, Pita ropa akil ndupa, elim kuimp tepa on kona nila purum. 5 Wote wu ni, elim murᵾk pi napᵾpa, kᵾp ropa moⱡpa, kᵾndrᵾm mel, muⱡ kurᵾmᵾⱡa ni mint titim. 6 Akil tepa, Pita ni omba, kun rukrᵾng mba kᵾndrᵾm mel, muⱡ kurᵾmᵾⱡᵾ ni, mint titim. 7 Wote, Jisas nga peng ei, kum rorung muⱡ ni, merᵾng tila, elpa kawa nduk, ek nduk, kai etᵾk tetᵾng ei mel titim. 8 Ni kᵾn, kitip kᵾni wu kuimp titim ni, akil tepa, rukrᵾng mba kandpa, mondpa pitim. 9 Jisas koⱡpa, wote ⱡoporpa kont oⱡa moⱡmba ei nga, Buk Wingti ei ndi, nitim ik ei, pili napᵾtᵾng. 10 Wote, Jisas nga kitip kᵾni wu nimbᵾ, enim nga mang kona ila yant purung.

Jisas ndi, Mariya Makndelin Tingi Waka Ndurum

11 Ni kᵾn, Mariya ni, on kona ila ekit orunga anggilpa, ka etpa murum. Ka etpa moⱡpa, wote kᵾp ropa, on kona ni, tᵾpa murᵾk ndupa, kᵾndrᵾm mel, anggelo raⱡ mel kurᵾmᵾⱡᵾ mbᵾ ralkᵾⱡ, Jisas nga on ei, titim kona ila morᵾnggil. Anggelo ti, Jisas nga peng ei, titim ila moⱡnga ti, kᵾmp raⱡ titim ila murum. 13 Anggelo ni raⱡ ndi, amp ni kundkᵾⱡ nᵾkᵾⱡ mel, “Amp ye! Nim nambuⱡ emel, ka en?” nᵾtᵾnggil. Wote, amp ni ndi, punt ropa, nimba mel, “Na nga wu Nuim ei, tᵾk mek puk, nant ila teng nda? Na pili napᵾnt,” nitim. 14 Ik nimba pendpa, tᵾpa ropᵾl ropa, kᵾndrᵾm mel, Jisas ni, elim nga mbuldung orunga anggilpa murum. Wote, amp ni ndi, Jisas murum ni, tᵾpa mindi nᵾmᵾndᵾtᵾm. 15 Ni kᵾn, Jisas ndi, amp ni, waldpa nimba mel, “Amp ye! Nim nambuⱡ emel, ka en? Wote nim nam andkᵾn kurun?” nitim. Wote, amp ni ndi, wu ni kongun kona puⱡ wu ti, omba ninim nimba pilpa, nimba mel, “Wu Nuim ye! Nim ndi, wu on ei, tᵾkᵾn mekᵾn pun ndam, na kundkᵾn nana mbo tamp!” nitim. 16 Jisas ndi, amp ni, kundpa nimba mel, “Mariya!” nitim. Wote, amp ni ndi, tᵾpa ropᵾl ropa, Ipru ik ila, nimba mel, “Raponi!” nitim. Ik ei nga puⱡ ei, ‘Ik mbo wu,’ ei nᵾtmᵾn. 17 Ni kᵾn, Jisas ndi, nimba mel, “Na minda ndui nᵾndi! Nambuⱡ emel, na Wuta kᵾn, oⱡa pi nᵾpᵾnt. Ei nga, nim pukᵾn, na nga ᵾngᵾnᵾl kᵾⱡ kundkᵾn, na Wuta kᵾn oⱡa mbi ent ei, enim nga Wuta kᵾn, Na nga Got, wote enim nga Got,” nitim. 18 Wote, amp Mariya Makndelin tᵾkrᵾpa mba, kitip kᵾni wu ni kᵾⱡ, kundpa, elim Nuim ei kᵾnt, wote ik ei mel, kundpa nᵾm nitim.

Kitip Kᵾni Wu Kᵾⱡ Morung Ila, Jisas Mot nga Urum

19 Kor ou ni kᵾn rumbuldi, kitip kᵾni wu ni kᵾⱡ, Jura wu nimbᵾ nga mundmong endᵾk, manga kumba rok, gi nduk, murᵾk morung. Ni kᵾn, Jisas elim omba, rᵾk ting ila anggilpa, nimba mel, “Enim numan wang nduk muⱡᵾi!” nitim. 20 I nimba pendpa, elim nga ki na, wᵾnggᵾⱡᵾp na nimbᵾ, tᵾpa ora ndurum. Ni kᵾn, kitip kᵾni wu ni kᵾⱡ ndi, Nuim ei kandᵾk, numan kai pᵾtᵾng. 21 Wote Jisas ndi, aldpa nimba mel, “Enim numan wang nduk muⱡᵾi! Wuta ndi, na tᵾpa mundrum ei mel, na ndi, enim tᵾp mundunt,” nitim. 22 Ik i etpa, nimba pendpa, elim nga muⱡnga ei, pop ropa ngumba, nimba mel, “Enim Muⱡnga Wingti ei tᵾi! 23 Wote enim ndi, wamp mat nga uⱡ kit etmin mbᵾ pendᵾk, keling ndam, elim ndi, pendpa kelmba ku. Wote enim ndi, pendᵾk moⱡᵾng ndam, pendpa moⱡmba ku,” nitim.

Jisas Ni, Tomas Kᵾn Ik Nᵾtᵾnggil

24 Kitip kᵾni wu 12 ni kᵾⱡ nga ti, Tomas mbi tek, ‘pᵾklᵾm,’ nᵾtᵾng wu ni, Jisas urum ni kᵾn, muⱡi nᵾmbrᵾm. 25 Wote, kitip kᵾni wu kat ndi, Tomas kundᵾk nᵾk mel, “Tᵾn Wu Nuim ei kᵾnmᵾn!” nᵾtᵾng. Ni kᵾn, Tomas ndi, wu ni kᵾⱡ, kundpa nimba mel, “Na nga mong raⱡ ndi, Jisas nga rorung ki ᵾrᵾⱡa kᵾⱡ, kandᵾp minda ndup, wote porung wᵾnggᵾⱡᵾp ei, minda ndup int ndam, na kapⱡa mondᵾp pilimp,” nitim.

26 Wote, rumbᵾⱡ 8 omba puⱡnga, Tomas kunda, kitip kᵾni wu ni kᵾⱡ kᵾn, manga nila kumba rok gi nduk, murᵾk morung. Ni kᵾn, Jisas ni, tᵾkrᵾpa omba, rᵾk ting ila moⱡpa, nimba mel, “Enim numan wang nduk muⱡᵾi,” nitim. 27 Wote, Tomas kundpa nimba mel, “Nim nga ki ruⱡ ei, yant ndukᵾn, na nga ki raⱡ ambulkᵾn kᵾni! Wote ki run ndukᵾn, na nga wᵾnggᵾⱡᵾp ila, minda ndui! Nim numan ᵾk puk ti nᵾti! Nim mondkᵾn pili!” nitim. 28 Tomas ndi, punt ropa nimba mel, “Na nga Nuim wote, Na nga Got!” nitim. 29 Ni kᵾn, Jisas ndi, Tomas kundpa nimba mel, “Nim na kandkᵾn mondkᵾn pᵾn ei? Na kᵾni nakᵾndᵾk mondᵾk pᵾtmᵾn wamp mbᵾ, numan kai pilik muⱡᵾi!” nitim.

Jon Ndi, Mon Rurum Ei Nga Puⱡ Ei

30 Jisas ndi, elim nga kitip kᵾni wu kᵾⱡ mondpa, uⱡ wengᵾndupa mat minal itim mbᵾ, ya Buk ila, mon rok pindi napᵾndᵾtᵾng. 31 Wote, ya ik mbᵾ rorung ei, Jisas ei, Got nga kangᵾm, wote Got nga ngurum wu ei, mondᵾk pileing! Wote enim ndi, elim nga mbi ila mondᵾk piling ndam, enim uⱡ nga kᵾnt nga kont mul uⱡ ei ting.